Homiladorlik testi siydikdagi homiladorlik gormonini aniqlaydi. Uni juda erta qilsangiz, homiladorlik boʻlsa ham natija manfiy chiqishi mumkin. Shuning uchun koʻpchilik «homiladorlik testi necha kunda bilinadi» deb soʻraydi. Bu kalkulyator NHS tavsiyalariga koʻra testni qaysi kundan qilish ishonchli ekanini hisoblab beradi.
Oxirgi hayz sanasi va sikl davomiyligini kiriting. Hayz kuningiz nomaʼlum boʻlsa, faqat jinsiy aloqa sanasini tanlang. Maʼlumotlar hech qayerga yuborilmaydi.
Homiladorlik testi qachon qilinadi
NHS maʼlumotiga koʻra, koʻpchilik homiladorlik testlarini kechikkan hayzning birinchi kunidan qilish mumkin va aynan shu paytdan ular eng ishonchli natija beradi. Keyingi hayz qachon kelishi nomaʼlum boʻlsa, testni himoyalanmagan jinsiy aloqadan kamida 21 kun oʻtib qiling. Baʼzi juda sezgir testlar hayz kechikmasidan oldin ham ishlatilishi mumkin, lekin bunda notoʻgʻri manfiy natija ehtimoli yuqoriroq.
Kalkulyator qanday hisoblaydi
- Hayz sanasi maʼlum boʻlsa: oxirgi hayzning birinchi kuni + sikl davomiyligi = kutilgan hayz kuni. Test shu kundan qilinadi.
- Faqat jinsiy aloqa sanasi maʼlum boʻlsa: shu sana + 21 kun.
Natija manfiy chiqsa nima qilish kerak
Agar test manfiy boʻlsa-yu, homiladorman deb oʻylasangiz, bir necha kundan keyin testni qayta qiling. Ikkinchi test ham manfiy chiqsa va hayz hamon kelmasa, shifokorga murojaat qiling. Hayzning kechikishiga homiladorlikdan boshqa sabablar ham boʻlishi mumkin.
Erta qilingan test nega manfiy chiqishi va uy testining qondagi hCG tahlilidan farqi haqida test necha kunlik homilani sezishi maqolasida oʻqing.
Koʻp beriladigan savollar
Homiladorlik testi necha kunda bilinadi?
Koʻpchilik testlar kechikkan hayzning birinchi kunidan ishonchli natija beradi. Hayz kuni nomaʼlum boʻlsa — jinsiy aloqadan kamida 21 kun keyin.
Testni kunning qaysi vaqtida qilgan maʼqul?
Har bir testning yoʻriqnomasi har xil boʻlishi mumkin — oʻzingiz sotib olgan testning yoʻriqnomasiga amal qiling.
Ijobiy natijadan keyin nima qilish kerak?
Homiladorlikni tasdiqlash va kuzatuvni boshlash uchun shifokor yoki ayollar konsultatsiyasiga murojaat qiling. Taxminiy muddatni homiladorlik kalkulyatori bilan hisoblashingiz mumkin.